الفرحة : حاجات بسيطة تعيشهم : قهوة مع لصحاب، دورة في المدينة ، فيلم تتفرج فيه، خدمة تتقنها، ضحكة من القلب تخرجها...
الفرحة ما تتشراش و ما تتسلفش اما تقبل القسمة على اثنين وعلى ثلاثة و على ألف كان لزم...
الفرحة : لحظة من الزمان تسرقها... الفرحة كلمة حلوة تسمعها...
الفرحةاليوم : مطبقة من قلب الجريد ريحتها تفوح، مطبقة من قلب الصحراء تخاطب الروح، مطبقة للأحباب تروح...
اليوم المطبقة عليها تلموا أصحاب، من الغرب و الشرق الزمان جمعهم... أصحاب عالحلوة و المرة تعاهدوا... أصحاب حب السينما وحدهم... أصحاب تجمعوا ما تفرقوا... أصحاب حكاياتهم انصهروا في حكاية...
المطبقة بالحب اطبخت و بيدين الحراير تعجنت، و على الأصحاب تفرقت....
مطبقة بالحكايات محملة... حكايات ناس ما هي كيف الناس ، حكايات ناس ما تطاطي الراس و ما تطيق الذل و الهوان، حكايات ناس ترى بالعشرة و ما تبيعها بالمال...
Aucun commentaire:
Enregistrer un commentaire