صورة اليوم برشة صور في صورة، برشة حكايات في حكاية
حكاية بلاد تاريخها أقدم من الزمن ... حكاية باعوا تاريخهم و شراو تاريخ الناس ...حكاية بلاد عاندت الزمان... حكاية ناس في قلب الجبال بناو و علاو... حكاية رجال و نساء ما سلموش في ورث الأجداد ...
وأنا صغير تعلمت كيف الصغار الكل الكلام في دارنا أما تعلمت لغة ما يتعلموهاش الناس الكل : الأمازيغية. في المدرسة تعلمت العربية و قريت على تاريخ تونس و في كل مرحلة كنت نستنى بش لغتي الأم تضهر في درس من الدروس ...
قريت إلي في تونس كان ثمة بربر وجات عليسة و جابت الحضارة. قريت إلي نحن عرب... و كنت ديمة نحس إلي ثمة حاجة مش عادية فالحكايات هاذم. كبرت و لقيت الفرصة بش نعرف حقيقة أخرى من خلال جلوسي مع كبار العيلة و من خلال الانترنت.
عرفت إلي تاريخ تونس أقدم بياسر من قرطاج... عرفت إلي لبلاد هذي أمازيغية منذ القدم ... عرفت قداش تونس بلاد عظيمة الشأن...
اليوم ثمة ناس قرروا انهم يصلحوا ما أفسده من سبقهم و يعرفوا بالثقافة و الموروث الحضاري الكبير إلي خلاوه أجدادنا الأمازيغ. ناس عارفين تاريخهم و معتزين به و لغتهم ما سلموش فيها و لاولادهم علموها.
اليوم حسيت قداش أنا تونسي و أنا نرى في توانسة من مختلف الولايات جمعهم حبهم لبلادهم و رغبتهم في حماية تاريخها مالضياع...
الناس هاذم جمعهم حلم جميل يحبوا يعيشوه و واقع مرير يحبوا يبدلوه... حكايتهم تتلخص في ثلاثة كلمات هي : الأرض الإنسان اللغة...
Aucun commentaire:
Enregistrer un commentaire